اسلام آباد (وائس آف رشیا) اینٹی نارکوٹکس فورس (اے این ایف) نے ملک کے مختلف شہروں اور تعلیمی اداروں کے اطراف منشیات اسمگلنگ کے خلاف کریک ڈاؤن کرتے ہوئے 4 کروڑ 37 لاکھ روپے سے زائد مالیت کی 56.750 کلوگرام منشیات برآمد کی اور 2 ملزمان کو گرفتار کیا۔
اے این ایف کے ترجمان کے مطابق، سنگجانی ٹول پلازہ اسلام آباد کے قریب رکشہ سے 3.6 کلوگرام چرس برآمد کی گئی اور ایک ملزم گرفتار کر لیا گیا۔
اسی طرح دیگر کارروائیوں میں جناح ایئرپورٹ کراچی سے دبئی جانے والے مسافر کے سامان میں رکھی 0.150 کلوگرام کوکین برآمد ہوئی اور ملزم کو حراست میں لے لیا گیا۔
گوادر چربدر کوسٹل لائن، پسنی کے قریب چھپائی گئی 30 کلوگرام ہیروئن اور 23 کلوگرام آئس بھی برآمد کر لی گئی۔
ترجمان نے بتایا کہ تمام کارروائیوں کے بعد انسداد منشیات ایکٹ 1997 کے تحت مقدمات درج کر کے تحقیقات کا آغاز کر دیا گیا ہے۔
