ماسکو(وائس آف رشیا) یوکرین کے صدر ولادیمیر زیلنسکی نے کہا ہے کہ 19 جولائی کی شب کیف پر ہونے والا حملہ حالیہ عرصے کے سب سے بڑے بیلسٹک حملوں میں سے ایک تھا اور اس کے بعد انہوں نے مغربی اتحادیوں سے فضائی دفاعی نظام کے لیے مزید میزائل فراہم کرنے کی دوبارہ اپیل کی ہے۔
زیلنسکی نے اپنے ٹیلیگرام پیغام میں کہا کہ کیف پر یہ سب سے بڑے بیلسٹک حملوں میں سے ایک تھا اور فضائی دفاع کے لیے انٹرسیپٹر میزائل روزانہ کی بنیاد پر درکار ہیں۔
انہوں نے بتایا کہ حملوں کے بعد دارالحکومت کیف میں دھماکوں سے ہونے والے نقصانات کو دور کرنے کا عمل جاری ہے، جبکہ 600 سے زائد امدادی اہلکار ریسکیو اور بحالی کی کارروائیوں میں مصروف ہیں۔
دوسری جانب روسی وزارت دفاع نے اس سے قبل بتایا تھا کہ روسی افواج نے کیف میں واقع ایسے متعدد صنعتی اداروں کو نشانہ بنایا ہے جو یوکرینی مسلح افواج کے لیے فوجی سازوسامان تیار کرتے ہیں۔
واضح رہے کہ یوکرینی حکام گزشتہ کئی ماہ سے مغربی ممالک سے مسلسل مطالبہ کر رہے ہیں کہ یوکرین کو فضائی دفاعی نظام کے لیے مزید میزائل اور اسلحہ فراہم کیا جائے، کیونکہ ان کے بقول موجودہ ذخائر مسلسل حملوں کے باعث تیزی سے کم ہو رہے ہیں۔
