ماسکو(وائس آف رشیا): روسی وزارت دفاع نے کہا ہے کہ گزشتہ شب یوکرین کی جانب سے روسی علاقوں پر بڑے پیمانے پر ڈرون حملے کیے گئے، جن کے دوران روسی فضائی دفاعی نظام نے 379 یوکرینی ڈرونز کو تباہ کر دیا۔ حملوں میں 8 افراد ہلاک جبکہ 86 افراد زخمی ہوئے۔
وزارت دفاع کے مطابق ڈرونز کو بیلگورود، بریانسک، کرسک، اسمولینسک، ریازان، کالوگا، تولا، تامبوف، اوریول، لیپیتسک، تویر، پسکوف، وورونژ، روستوف، وولگوگراد، لینن گراڈ، ولادیمیر، ماسکو ریجن، کراسنودار، جمہوریہ کریمیا سمیت بحیرہ آزوف اور بحیرہ اسود کے اوپر مار گرایا گیا۔
ماسکو کے میئر سرگئی سوبیانن کے مطابق 17 جولائی کی شام سے 18 جولائی کی صبح تک تقریباً 370 ڈرون ماسکو ریجن کی جانب بڑھ رہے تھے، جنہیں فضائی دفاعی نظام نے تباہ کیا۔
روس کے تامبوف ریجن میں یوکرینی ڈرون حملے کے نتیجے میں وائلڈ بیریز (Wildberries) کے لاجسٹکس مرکز کو نشانہ بنایا گیا، جہاں 7 افراد ہلاک اور 25 زخمی ہوئے۔
ریجن کے قائم مقام گورنر یفگینی پیرویشوف کے مطابق زخمیوں میں سے 22 افراد اسپتالوں میں زیر علاج ہیں، جبکہ 8 کی حالت تشویشناک بتائی گئی ہے۔ حملے کے بعد گودام میں لگنے والی آگ پر قابو پا لیا گیا ہے۔
حکام کے مطابق حملے میں چار مرد اور تین خواتین جان کی بازی ہار گئے، جبکہ زخمیوں میں 16 مرد اور 9 خواتین شامل ہیں۔
ماسکو ریجن کے شہروں نوگنسک اور الیکٹروسٹال میں بھی یوکرینی ڈرون حملے کیے گئے۔
گورنر آندرے وروبیوف کے مطابق نوگنسک میں ڈرون گرنے سے تیل ذخیرہ کرنے کے ایک مرکز میں آگ لگ گئی، جبکہ قریبی زچگی اسپتال سے 22 خواتین اور 7 بچوں کو محفوظ مقام پر منتقل کیا گیا۔
الیکٹروسٹال میں وائلڈ بیریز کے ایک گودام پر بھی ڈرون گرنے سے آگ بھڑک اٹھی، جس پر بعد ازاں قابو پا لیا گیا۔
بعد ازاں حکام نے بتایا کہ حملوں میں زخمی ہونے والوں میں سے ایک شخص اسپتال میں دم توڑ گیا، جس کے بعد ماسکو ریجن میں ہلاکتوں کی تعداد ایک اور زخمیوں کی تعداد 61 ہو گئی۔ ان میں سے 9 افراد کی حالت تشویشناک بتائی گئی ہے۔
روس کی تحقیقاتی کمیٹی نے تامبوف اور ماسکو ریجن میں لاجسٹکس مراکز پر حملوں کے بعد دہشت گردی کے مقدمات درج کر لیے ہیں۔
روسی وزارت خارجہ کے خصوصی سفیر رودیون میروشینک نے کہا کہ تامبوف میں وائلڈ بیریز کے گودام کو جان بوجھ کر نشانہ بنایا گیا۔
روسی انسانی حقوق کی کمشنر یانا لانتراتوا نے حملوں کو شہری آبادی کے خلاف دہشت گردی اور جنگی جرائم قرار دیتے ہوئے کہا کہ اس معاملے پر اقوام متحدہ کے ہائی کمشنر برائے انسانی حقوق اور اقوام متحدہ کے متعلقہ حکام سے رابطہ کیا گیا ہے۔
روستوف ریجن میں تقریباً 30 ڈرون مار گرائے گئے جبکہ وورونژ، تولا، لینن گراڈ اور دیگر علاقوں میں بھی متعدد ڈرون تباہ کیے گئے۔
کرسک ریجن میں ایک توانائی کے مرکز پر حملے کے باعث 46 ہزار سے زائد صارفین کی بجلی منقطع ہو گئی، جبکہ ولادیمیر ریجن میں ایک رہائشی عمارت میں ڈرون گرنے سے آگ لگ گئی، تاہم وہاں کسی جانی نقصان کی اطلاع نہیں ملی۔
روسی وزارت دفاع کے مطابق حملوں کے بعد تمام متاثرہ علاقوں میں ہنگامی امدادی کارروائیاں اور نقصانات کا جائزہ لینے کا عمل جاری ہے۔
