ماسکو(وائس آف رشیا) کریملن کے ترجمان دیمتری پیسکوف نے کہا ہے کہ روس جنوب مشرقی ایشیائی ممالک کے رہنماؤں کو روس-آسیان سربراہ اجلاس میں شرکت کے لیے جلد باضابطہ دعوت نامے ارسال کرے گا، جو 17 سے 19 جون تک کازان میں منعقد ہوگا۔
اخبار ایزوستیا سے گفتگو کرتے ہوئے پیسکوف نے بتایا کہ اس سلسلے میں تیاریوں کا عمل شروع کیا جا رہا ہے اور سرکاری دعوت نامے مرحلہ وار بھیجے جائیں گے، جس میں کچھ وقت درکار ہوگا۔
انہوں نے کہا کہ اس عمل میں آرگنائزنگ کمیٹی کلیدی کردار ادا کرے گی، جو اجلاس کے انتظامات اور تیاریوں کی نگرانی کرے گی۔
پیسکوف کے مطابق اجلاس کے موقع پر ممکنہ دوطرفہ ملاقاتوں کا انحصار تیاریوں کی پیش رفت پر ہوگا، تاہم یہ اجلاس بنیادی طور پر کثیرالجہتی نوعیت کا حامل ہوگا۔
رپورٹ کے مطابق روسی صدر ولادیمیر پوتن نے اس حوالے سے ایک حکم نامہ بھی جاری کیا ہے، جس کے تحت ایک آرگنائزنگ کمیٹی قائم کی گئی ہے جس کی سربراہی کریملن کے معاون یوری اوشاکوف کریں گے۔
یہ سربراہ اجلاس روس اور آسیان کے درمیان تعلقات کی 35ویں سالگرہ کے موقع پر منعقد کیا جا رہا ہے، جبکہ اس سے قبل روس نے 2016 میں سوچی میں اس فورم کی میزبانی کی تھی۔
