ماسکو (وائس آف رشیا) روسی وزارتِ خارجہ کی ترجمان ماریا زخارووا نے افغانستان اور پاکستان کی سرحد پر 10 اور 11 اکتوبر کو پیش آنے والی تازہ جھڑپوں پر گہری تشویش کا اظہار کیا ہے۔
ماسکو میں ہفتہ وار بریفنگ کے دوران ماریا زخارووا نے کہا کہ کابل اور اسلام آباد نے حالیہ سرحدی تصادم کی نوعیت اور اس کے اسباب کے بارے میں مختلف مؤقف پیش کیے ہیں۔
ان کے مطابق، دونوں جانب سے فضائی کارروائیوں اور فائرنگ کے تبادلے کی اطلاعات موصول ہوئی ہیں، جنہوں نے سرحدی علاقے کے ایک وسیع حصے — خصوصاً پشتون قبائلی پٹی — کو اپنی لپیٹ میں لے رکھا ہے۔
ترجمان کے بقول، دستیاب معلومات کے مطابق جھڑپوں میں دونوں ممالک کے فوجی اہلکاروں کے جانی نقصان کی خبریں بھی موصول ہوئی ہیں۔
انہوں نے کہا کہ “تازہ اطلاعات کے مطابق، صورتحال اب بتدریج استحکام کی جانب گامزن ہے، اور روس اس پیش رفت کا خیرمقدم کرتا ہے۔”
زخارووا نے دونوں ملکوں سے اپیل کی کہ وہ تحمل و برداشت کا مظاہرہ کریں اور تمام اختلافات کو سیاسی و سفارتی ذرائع سے حل کریں۔
ترجمان نے کہا کہ روس کو امید ہے کہ “ہمارے دونوں دوست ممالک، افغانستان اور پاکستان، انسدادِ دہشت گردی، سرحدی سلامتی اور علاقائی استحکام سے متعلق معاملات پر باہمی تعاون جاری رکھیں گے۔”
