ماسکو:(وائس آف رشیا) روس کے وولگا ریجن کے شہر اولیانووسک پر بڑے پیمانے پر ڈرون حملہ کیا گیا ہے، جس کے نتیجے میں شہری اور صنعتی انفراسٹرکچر کو نقصان پہنچا جبکہ متعدد افراد کے متاثر ہونے کی اطلاعات بھی سامنے آئی ہیں۔
اولیانووسک ریجن کے گورنر الیکسی روسکیخ کے مطابق روسی فضائی دفاعی نظام اور موبائل فائر گروپس شہر پر ہونے والے ڈرون حملے کو پسپا کرنے کی کارروائی جاری رکھے ہوئے ہیں۔
گورنر نے میکس میسنجر پر جاری بیان میں کہا کہ حملے کے دوران صنعتی اور شہری تنصیبات کو نقصان پہنچنے کے واقعات ریکارڈ کیے گئے ہیں۔
انہوں نے بتایا کہ حملے میں جانی نقصان بھی رپورٹ ہوا ہے اور متاثرہ افراد کو ضروری طبی امداد فراہم کی جا رہی ہے۔ تاہم فوری طور پر متاثرین کی تعداد اور ان کی حالت کے بارے میں مزید تفصیلات جاری نہیں کی گئیں۔
مقامی حکام صورتحال کا جائزہ لے رہے ہیں جبکہ فضائی دفاعی یونٹس شہر اور اطراف کے علاقوں میں ڈرون خطرے سے نمٹنے کے لیے کارروائی جاری رکھے ہوئے ہیں۔
