ماسکو:(وائس آف رشیا) روس کی وزارت دفاع نے کہا ہے کہ رات بھر ملک کے مختلف علاقوں پر بڑے پیمانے پر ڈرون حملوں کے دوران فضائی دفاعی نظام نے 592 یوکرینی ڈرونز کو تباہ یا انٹرسیپٹ کیا۔ مختلف علاقوں میں ہونے والے حملوں میں ایک شخص ہلاک جبکہ بچوں سمیت متعدد افراد زخمی ہوئے اور شہری و صنعتی تنصیبات کو بھی نقصان پہنچا۔
روسی وزارت دفاع کے مطابق 24 ستمبر کی رات 8 بجے سے 25 ستمبر کی صبح 8 بجے تک مختلف روسی علاقوں، بحیرہ اسود اور کریمیا کے اوپر فکسڈ ونگ ڈرونز کو نشانہ بنایا گیا۔ وزارت کے مطابق ڈرونز بیلگورود، بریانسک، وولگوگراد، وورونژ، کالوگا، کرسک، لیپتسک، اوریول، روستوف، تویر، تولا، سمارا، سمولینسک، ماسکو، کراسنودار اور پرم ریجنز سمیت متعدد علاقوں میں مار گرائے گئے۔
حکام کے مطابق وورونژ ریجن میں 88، روستوف ریجن میں تقریباً 50، کالوگا میں 36، تولا میں 33 جبکہ اوریول ریجن میں 17 ڈرونز تباہ کیے گئے۔
اولیانووسک ریجن کے گورنر الیکسی روسکیخ کے مطابق ڈرون حملے میں 8 افراد زخمی ہوئے جن میں 14 اور 17 سال کے دو بچے بھی شامل ہیں۔ علاقائی وزارت صحت کے مطابق زخمیوں میں سے تین افراد کو ہسپتال منتقل کیا گیا۔
حملے کے نتیجے میں اولیانووسک میں ایک صنعتی پلانٹ اور رہائشی عمارتوں کو بھی نقصان پہنچا۔ روسی تحقیقاتی کمیٹی نے شہری تنصیبات پر حملے کے سلسلے میں دہشت گردی کے الزام کے تحت فوجداری مقدمہ درج کر کے تحقیقات شروع کردی ہیں۔
پرم ریجن کے گورنر دمتری ماخونن کے مطابق ڈرون حملے کے نتیجے میں ایک شخص شریپنل لگنے سے ہلاک ہوگیا۔ ایک صنعتی تنصیب کو بھی نشانہ بنایا گیا جہاں حملے کے بعد امدادی کارروائیاں جاری ہیں۔
وورونژ ریجن میں ڈرون حملوں کے نتیجے میں زخمی ہونے والوں کی تعداد بڑھ کر 13 ہوگئی، جن میں ایک چھ سالہ بچہ بھی شامل ہے۔ علاقائی گورنر کے مطابق ایک خاتون اور ایک مرد انتہائی نگہداشت کے شعبے میں زیر علاج ہیں۔ حملے سے رہائشی عمارتوں کی کھڑکیوں اور متعدد گاڑیوں کو بھی نقصان پہنچا۔
روستوف اور بیلگورود بھی متاثر
روستوف ریجن کے شہر نووشاختنسک میں فضائی حملے کے دوران ایک پیٹرولیم پلانٹ کو نقصان پہنچنے کی اطلاع دی گئی۔
بیلگورود ریجن میں حکام کے مطابق پیاتنیتسکوئے کے قریب ایک ٹرک پر حملے میں ایک شخص ہلاک ہوگیا، جبکہ وولوکونووکا میں ایک اور شخص شریپنل لگنے سے زخمی ہوا اور اسے ہسپتال منتقل کردیا گیا۔
تولا ریجن کے شہر یفریموف میں بھی کئی رہائشی عمارتوں اور گھروں کی کھڑکیوں کو نقصان پہنچا، تاہم ابتدائی اطلاعات کے مطابق وہاں کوئی شخص زخمی نہیں ہوا۔
روسی حکام نے مختلف علاقوں میں ڈرون حملوں کے بعد نقصانات کا جائزہ لینے اور متاثرہ مقامات پر امدادی کارروائیاں جاری رکھنے کی اطلاع دی ہے۔
