ماسکو(وائس آف رشیا) روس کے وزیر خارجہ سرگئی لاوروف اور متحدہ عرب امارات کے نائب وزیر اعظم و وزیر خارجہ عبداللہ بن زاید النہیان کے درمیان ٹیلیفونک رابطہ ہوا، جس میں دوطرفہ تعاون اور علاقائی صورتحال پر تبادلہ خیال کیا گیا۔
روسی وزارت خارجہ کے مطابق دونوں وزرائے خارجہ نے روس اور امارات کے صدور کے درمیان طے پانے والے معاہدوں کی روشنی میں باہمی تعاون کو مزید فروغ دینے کے امور پر بات چیت کی، جبکہ انسانی روابط اور عوامی سطح پر تعلقات کے فروغ کو خاص اہمیت دی گئی۔
گفتگو کے دوران اس بات پر اطمینان کا اظہار کیا گیا کہ یوریشین اکنامک یونین اور متحدہ عرب امارات کے درمیان آزاد تجارتی معاہدہ جلد نافذ العمل ہونے والا ہے۔
دونوں رہنماؤں نے بین الاقوامی امور پر بھی تبادلہ خیال کیا، جن میں آبنائے ہرمز کی صورتحال شامل ہے، اور اس بات پر اتفاق کیا کہ خطے میں دیرپا استحکام کے لیے مذاکرات کا دوبارہ آغاز ضروری ہے تاکہ تمام متعلقہ ممالک کے جائز مفادات کو مدنظر رکھتے ہوئے حل نکالا جا سکے۔
وزرائے خارجہ نے آئندہ سفارتی رابطوں اور ملاقاتوں کے شیڈول پر بھی غور کیا اور باہمی رابطے برقرار رکھنے پر اتفاق کیا۔
