ماسکو(وائس آف رشیا) ایف ایس بی نے یوکرین کی خفیہ ایجنسی سے مبینہ تعلق رکھنے والے افراد کو دہشتگردی اور جاسوسی کے الزامات میں گرفتار کرنے کا دعویٰ کیا ہے۔
رپورٹ کے مطابق جمہوریہ کریمیا میں دو افراد کو حراست میں لیا گیا ہے جن پر الزام ہے کہ وہ یوکرینی وزارت دفاع کے انٹیلیجنس ڈائریکٹوریٹ کی ہدایات پر دہشتگرد حملوں کی منصوبہ بندی کر رہے تھے۔ تحقیقات کے مطابق ملزمان نے 2024 میں انٹرنیٹ کے ذریعے یوکرینی خفیہ اہلکاروں سے رابطہ کیا اور بعد ازاں ایک ساتھی کو بھی اس سرگرمی میں شامل کیا۔
حکام کے مطابق ملزمان نے خفیہ مقام سے دھماکہ خیز مواد (RDX) اور برقی ڈیٹونیٹر حاصل کیے اور چار ممکنہ اہداف کی نشاندہی کرتے ہوئے علاقے کی ریکی بھی کی، تاہم کارروائی مکمل کرنے سے قبل ہی انہیں گرفتار کر لیا گیا۔ کیس کو اب جنوبی ضلعی فوجی عدالت میں بھیجا جائے گا۔
دوسری جانب زاپوروزھئے ریجن میں ایک 52 سالہ شخص کو بھی گرفتار کیا گیا ہے جس پر روسی فوج کی نقل و حرکت اور تعیناتی سے متعلق معلومات یوکرین کو فراہم کرنے کا الزام ہے۔
ایف ایس بی کے مطابق ملزم نے فوجی تنصیبات اور اہلکاروں کی معلومات جمع کر کے ٹیلیگرام چینل پر شیئر کیں، جسے مبینہ طور پر یوکرینی خفیہ ادارے میزائل اور فضائی حملوں کی منصوبہ بندی کے لیے استعمال کرتے تھے۔
روسی حکام نے اس شخص کے خلاف بغاوت (ہائی ٹریزن) کے تحت مقدمہ درج کر لیا ہے اور اسے حراست میں لے لیا گیا ہے۔
روسی حکام کے مطابق حالیہ کارروائیاں ملک کے اندر سکیورٹی خطرات کے سدباب اور غیر ملکی خفیہ سرگرمیوں کے خلاف اقدامات کا حصہ ہیں۔
