ماسکو (وائس آف رشیا) روسی وزیر خارجہ سرگئی لاوروف نے کہا ہے کہ نیٹو اور یورپی یونین دونوں کے اندر بحران کے واضح آثار نظر آ رہے ہیں۔
یہ بات انہوں نے شنگھائی تعاون تنظیم (ایس سی او) کے سیکریٹری جنرل نورلان یرمیکبایف سے ملاقات کے دوران کہی، جہاں عالمی صورتحال اور بین الاقوامی تعلقات پر تبادلہ خیال کیا گیا۔
سرگئی لاوروف نے کہا کہ روس اس وقت نیٹو اور یورپی یونین کے اندر بڑھتے ہوئے اختلافات اور مشکلات کا مشاہدہ کر رہا ہے۔ ان کے مطابق مغربی ممالک اپنی اندرونی مشکلات کو دیگر غیر مغربی تنظیموں پر مسلط کرنے کی کوشش کر رہے ہیں۔
انہوں نے طنزیہ انداز میں ایک روسی فلم کا حوالہ دیتے ہوئے کہا کہ مغربی ممالک کا رویہ کچھ اس طرح ہے کہ اگر ہم بحران میں ہیں تو دوسروں کو بھی اس سے بچنے نہیں دیں گے۔
روسی وزیر خارجہ نے کہا کہ موجودہ حالات میں کثیرالجہتی سفارتکاری اور نئے عالمی نظام کی تشکیل اہم ہے، تاہم مغربی پالیسیوں میں اس حوالے سے تضادات بھی نظر آتے ہیں۔
انہوں نے اس بات پر زور دیا کہ دنیا ایک نئے توازن کی طرف بڑھ رہی ہے، جہاں مختلف طاقتیں اپنا کردار ادا کر رہی ہیں، اور ایسے میں تعاون اور برابری کی بنیاد پر تعلقات ناگزیر ہیں۔
