ماسکو(وائس آف رشیا) امریکی اخبار دی نیویارک ٹائمز (NYT) نے دعویٰ کیا ہے کہ روسی حکام نے امریکا کو ایک سفارتی نوٹ بھیج کر وینزویلا جانے والے آئل ٹینکر بیلا 1 (Bella 1) کا تعاقب فوری طور پر روکنے کی درخواست کی ہے۔ اخبار کے مطابق یہ درخواست نئے سال کی آمد سے کچھ دیر قبل بھیجی گئی۔
NYT کی رپورٹ میں کہا گیا ہے کہ امریکا کی جانب سے وینزویلا کے تیل سے لدے جہازوں کے خلاف جاری کارروائیوں کے تناظر میں روس کی یہ مبینہ درخواست واشنگٹن اور ماسکو کے درمیان جاری رابطوں میں نیا پہلو شامل کر سکتی ہے۔
امریکی اخبار کے مطابق اس سے قبل بھی یہ رپورٹ کیا گیا تھا کہ ٹینکر بیلا 1 کے عملے نے مبینہ طور پر جہاز پر روسی پرچم کی تصویر بنائی تھی۔ رپورٹ میں یہ بھی کہا گیا ہے کہ دسمبر میں ایک امریکی عدالت نے وینزویلا کے تیل سے لدے اس ٹینکر کی گرفتاری اور ضبطی کا وارنٹ جاری کیا تھا۔
تاہم روسی حکام کی جانب سے اس خبر پر باضابطہ تصدیق یا تردید سامنے نہیں آئی۔ روسی ذرائع ابلاغ اس خبر کو NYT کے دعوے کے طور پر رپورٹ کر رہے ہیں، جب کہ ماسکو کی جانب سے سرکاری سطح پر ابھی تک کوئی تفصیلی بیان جاری نہیں کیا گیا۔
