ماسکو(وائس آف رشیا) آذربائیجان کے وزیر خارجہ جیحون بایراموف 16 اور 17 جولائی کو روس کا سرکاری دورہ کریں گے، جہاں وہ اپنے روسی ہم منصب سرگئی لاوروف سے ملاقات اور مذاکرات کریں گے۔
روسی وزارت خارجہ کے مطابق ملاقات کے دوران دونوں ممالک کے درمیان دوطرفہ تعاون کی موجودہ صورتحال اور مستقبل کے امکانات کا جائزہ لیا جائے گا، جبکہ علاقائی اور بین الاقوامی امور پر بھی تفصیلی تبادلہ خیال کیا جائے گا۔
بیان میں کہا گیا ہے کہ آذربائیجان جنوبی قفقاز اور بحیرہ کیسپین کے خطے میں روس کا ایک اہم شراکت دار ہے، جبکہ دونوں ممالک کے تعلقات روایتی دوستی اور اچھے ہمسایہ تعلقات کی بنیاد پر مسلسل فروغ پا رہے ہیں۔
روسی وزارت خارجہ کے مطابق ماسکو اور باکو کے درمیان روزمرہ تعاون برابری، باہمی احترام اور ایک دوسرے کے مفادات کے خیال رکھنے کے اصولوں پر استوار ہے، اور دونوں ممالک مختلف شعبوں میں تعاون کو مزید وسعت دینے کے لیے کام جاری رکھے ہوئے ہیں۔
