برسلز(وائس آف رشیا) یورپی یونین نے یوکرین سے آنے والے پناہ گزینوں کے لیے عارضی تحفظ (Temporary Protection) کی مدت 4 مارچ 2028 تک بڑھانے کا فیصلہ کیا ہے، تاہم مارچ 2027 سے فوجی عمر کے یوکرینی مردوں کے لیے اس اسکیم کے قواعد میں تبدیلی کی جائے گی۔
یورپی یونین کونسل کے جاری کردہ بیان کے مطابق رکن ممالک نے اتفاق کیا ہے کہ موجودہ عارضی تحفظ کی مدت میں توسیع کرتے ہوئے اسے 4 مارچ 2028 تک برقرار رکھا جائے۔
بیان میں کہا گیا ہے کہ یوکرین سے بے گھر ہونے والے افراد کے تحفظ کے ساتھ ساتھ یوکرین کی دفاعی ضروریات کو مدنظر رکھتے ہوئے فیصلہ کیا گیا ہے کہ 4 مارچ 2027 کے بعد عارضی تحفظ صرف ان افراد کو دیا جائے گا جو یوکرین میں اپنی فوجی ذمہ داریوں کی تعمیل کر رہے ہوں۔
بیان کے مطابق یہ نئی شرائط 4 مارچ 2027 سے نافذ ہوں گی، جب موجودہ عارضی تحفظ کا نظام اپنی مقررہ مدت مکمل کرے گا۔
یورپی یونین نے واضح کیا ہے کہ یہ فیصلہ یورپ میں پہلے سے مقیم فوجی عمر کے یوکرینی مردوں کی ملک بدری سے متعلق نہیں ہے۔ نئی پابندیاں صرف ان افراد پر لاگو ہوں گی جو 4 مارچ 2027 کے بعد پہلی مرتبہ یورپی یونین میں عارضی تحفظ حاصل کرنے کے لیے آئیں گے۔
یورپی یونین کے مطابق عارضی تحفظ کی مجموعی مدت میں توسیع کا مقصد یوکرین سے بے گھر ہونے والے شہریوں کو قانونی تحفظ فراہم کرنا ہے، جبکہ نئی پالیسی کے تحت فوجی عمر کے مردوں سے متعلق شرائط میں بھی تبدیلی متعارف کرائی گئی ہے۔
