ماخاچکالا (وائس آف رشیا) روس کے جنوبی علاقے داغستان میں جمعہ کے روز ایک “کا-226” ہیلی کاپٹر گر کر تباہ ہو گیا، جس کے نتیجے میں چار افراد جاں بحق اور تین زخمی ہو گئے۔ ابتدائی معلومات کے مطابق حادثہ آچی سو کے علاقے میں پیش آیا۔
روسی ایمرجنسی منسٹری کے مطابق، یہ ہیلی کاپٹر “کزلیار الیکٹرو مکینیکل پلانٹ” کے زیرِ ملکیت تھا اور کزلیار سے ازبرباش جا رہا تھا۔ دورانِ پرواز اچانک خراب ہو کر یہ ایک خالی گھر پر جا گرا، جس کے نتیجے میں مکان مکمل طور پر تباہ ہو گیا۔ خوش قسمتی سے گھر میں کوئی شخص موجود نہیں تھا۔
حادثے کے مقام پر 16 امدادی کارکن اور چار ریسکیو گاڑیاں مصروفِ عمل رہیں۔ فائر فائٹرز نے موقع پر لگی آگ پر قابو پا لیا۔ زخمیوں کو شدید جھلسنے کے باعث ازبرباش اسپتال منتقل کیا گیا، جہاں دو افراد کی حالت نازک بتائی جا رہی ہے۔
ابتدائی تحقیقات میں تکنیکی خرابی کو حادثے کی ممکنہ وجہ قرار دیا جا رہا ہے۔ جنوبی ٹرانسپورٹ پراسیکیوٹر آفس نے ہنگامی انکوائری شروع کر دی ہے، جبکہ واقعے کی مکمل وجوہات جاننے کے لیے فوجداری مقدمہ درج کیا گیا ہے۔
تحقیقات کے مطابق، طیارے کے عملے نے حادثے سے قبل ہنگامی لینڈنگ کی کوشش کی تھی، تاہم وہ کامیاب نہ ہو سکے۔
