تہران (وائس آف رشیا) ایران اور روس نے صوبہ ہرمزگان میں ایٹمی بجلی گھر “ہرمز” کی تعمیر کے لیے 25 ارب ڈالر کا معاہدہ کر لیا۔ معاہدے پر دستخط کی ویڈیو ایرانی خبر رساں ایجنسی “ایرنا” نے جاری کی۔
ایران کی جانب سے معاہدے پر کمپنی “ایران ہرمز” کے نمائندے ناصر منصور شریف لو نے جبکہ روس کی جانب سے “روس اٹوم انرجی پراجیکٹس” کے دیمتری شیگانوف نے دستخط کیے۔
اطلاعات کے مطابق یہ ایٹمی بجلی گھر چار یونٹوں پر مشتمل ہوگا اور اس کے لیے 500 ہیکٹر رقبہ مختص کیا گیا ہے۔ اس وقت انجینئرنگ سروے اور تعمیراتی مقام کی تیاری کے کام جاری ہیں۔
فروری 2024 میں اُس وقت کے ایرانی صدر ابراہیم رئیسی نے “ہرمز” ایٹمی بجلی گھر کی تعمیر شروع کرنے کی ہدایت دی تھی۔ منصوبے کے تحت بجلی گھر کی مجموعی پیداواری صلاحیت 5 ہزار میگاواٹ ہوگی اور یہ مناب اور سیریک کے قریب تعمیر کیا جائے گا۔
ایران کی ایٹمی توانائی تنظیم کے سربراہ محمد اسلامی کے مطابق یہ منصوبہ ایران کی ایٹمی صنعت کی ترقی کی حکمتِ عملی کے اہم ترین اقدامات میں سے ایک ہے اور جلد اگلے مرحلے میں داخل ہو گا۔
