کیف(وائس آف رشیا) یوکرین نے بیلاروس کو خبردار کیا ہے کہ وہ آئندہ روس کے ساتھ ہونے والی مشترکہ فوجی مشقوں کے دوران یوکرینی سرحدوں سے دور رہے۔ یہ انتباہ اُس وقت آیا ہے جب “زیپاد-2025” فوجی مشقیں 12 سے 16 ستمبر تک بیلاروس میں منعقد ہونے جا رہی ہیں۔
یوکرینی وزارتِ خارجہ کے مطابق، بیلاروس روس کی مدد کر رہا ہے اور اسے کسی بھی “غیر ذمہ دارانہ اشتعال انگیزی” سے گریز کرنا چاہیے۔ بیان میں کہا گیا ہے کہ “ہم منسک کو خبردار کرتے ہیں کہ وہ سرحد کے قریب نہ آئے اور یوکرین کی دفاعی افواج کو اشتعال نہ دلائے۔”
بیلاروس کے وزیر دفاع وکٹر خرینن نے تصدیق کی ہے کہ ان مشقوں میں روس کا جدید “اوریشرنک” درمیانی فاصلے تک مار کرنے والا ہائپرسانک میزائل بھی شامل ہوگا، جسے پہلی بار نومبر 2024 میں یوکرین کے شہر دنیپر پر استعمال کیا گیا تھا۔ روسی حکام کے مطابق اس میزائل کی تباہ کن طاقت کم درجے کے ایٹمی حملے کے برابر ہے۔
