سیول(وائس آف رشیا) شمالی کوریا کے رہنما کم جونگ اُن نے یوکرینی دستوں سے کورسک ریجن کی آزادی میں حصہ لینے والے کوریائی فوجی کمانڈروں اور جوانوں کو “ہیرو آف دی پیپلز ریپبلک” کے اعزاز سے نوازا ہے۔
سرکاری خبررساں ایجنسی کے سی این اے کے مطابق یہ پہلا موقع ہے کہ اس نوعیت کی تقریب منعقد ہوئی۔ تقریب ورکرز پارٹی آف کوریا کی مرکزی کمیٹی کے ہیڈکوارٹرز میں منعقد ہوئی جہاں شہداء کے خاندان بھی شریک تھے۔
کم جونگ اُن نے خطاب میں فوجیوں کی “بے مثال بہادری اور قربانی” کو سراہتے ہوئے کہا کہ “ہمارے کمانڈر قوم کا فخر ہیں۔ انہوں نے گولیوں اور گولہ باری کی بارش میں شجاعت دکھائی، جیسا کہ کوریائی عوامی فوج سے توقع کی جاتی ہے۔”
تقریب کے دوران شہداء کے لیے ایک منٹ کی خاموشی اختیار کی گئی، جبکہ کوریا کے اسپیشل فورسز کے کمانڈر کرنل جنرل کم یونگ بک نے فوجیوں کی نمائندگی کرتے ہوئے خطاب کیا۔
کم جونگ اُن نے ذاتی طور پر نمایاں فوجی کمانڈروں اور جوانوں کو اعزازات اور تمغے عطا کیے۔ ان کا کہنا تھا کہ “کوریائی عوامی فوج کی خدمات نے دنیا بھر کی توجہ اپنی طرف مبذول کر لی ہے اور یہ ثابت کر دیا ہے کہ ہماری فوج دنیا کی سب سے سخت آزمائشوں میں بھی سرخرو ہو سکتی ہے۔”
ورکرز پارٹی کی رائے کے مطابق یہ آپریشن کوریائی عوامی فوج کے 70 سالہ تاریخ کے سب سے سخت امتحانوں میں سے ایک تھا، جس میں فوج نے اپنی جنگی تیاری اور صلاحیت کو ثابت کیا۔
