ماسکو(وائس آف رشیا) ماسکو میں پاکستان کے سفیر محمد خالد جمالی نے پاکستانی صحافی و نمائندہ دنیا نیوز روس شاہد گھمن کو ان کی اعلیٰ صحافتی خدمات کے اعتراف میں ایک اعزازی شیلڈ پیش کی۔ اس موقع پر قونصلر رانا محمد خالد ضیا بھی موجود تھے۔ یہ اعزاز نہ صرف ان کی محنت اور لگن کا اعتراف ہے بلکہ روس میں پاکستانی صحافت کے فروغ میں ان کے کردار کی گواہی بھی ہے۔
صحافتی سفر اور عالمی فورمز میں نمائندگی
شاہد گھمن نے 1996 میں صحافت کا آغاز روزنامہ خبریں جیسے معتبر ادارے سے کیا۔ 2017 میں ماسکو سے بطور فارن جرنلسٹ انہوں نے عالمی رپورٹنگ شروع کی۔ وہ 2017 سے فروری 2025 تک 92 نیوز کے نمائندہ خصوصی رہے اور فروری 2025 سے پاکستان کے معتبر دنیا میڈیا گروپ کے ساتھ بطور نمائندہ دنیا نیوز روس خدمات سرانجام دے رہے ہیں۔ اس کےساتھ ساتھ وہ “وائس آف رشیا” اردو کے چیف ایڈیٹربھی ہیں.
انہوں نے روس کے بڑے عالمی فورمز جیسے سینٹ پیٹرزبرگ انٹرنیشنل فورم، ایسٹرن اکنامک فورم ولادی ووستوک، کازان انٹرنیشنل فورم اور ورلڈ یوتھ فیسٹیول کی بھرپور کوریج کی۔ وہ روسی وزارت خارجہ میں بطور فارن جرنلسٹ رجسٹرڈ ہیں اور ترجمان ماریہ زخاررووا کی ہفتہ وار پریس بریفنگز میں بھی شریک ہوتے ہیں، جہاں وہ پاک روس تعلقات، مسئلہ کشمیر اور فلسطین سمیت اہم موضوعات پر سوالات کرتے ہیں۔
اینکرنگ اور انٹرویوز
شاہد گھمن نے لاہور سے تین سال تک ڈی ایم ڈیجیٹل ٹی وی یوکے پر پروگرامز کی میزبانی بھی کی، جس نے ان کی شخصیت کو ایک ہمہ جہت صحافی کے طور پر نمایاں کیا۔
انہوں نے کئی اہم رہنماؤں اور شخصیات کے انٹرویو کیے ہیں، جن میں وزیراعظم میاں محمد شہباز شریف، وزیر اطلاعات عطا تارڑ، وزیر مواصلات علیم خان، وزیر تجارت جام کمال، گورنربلوچستان جعفرخان مندوخیل، سفیر محمد خالد جمالی، سفیر شفقت علی خان، سفیر سجاد حیدر خان، سفیر محمد اعجاز، منسٹر ٹریڈ ناصر حامد، مذہبی اسکالر مولانا محمد تقی عثمانی اور ماسکو میں تعینات فلسطین کے سفیر عبدالحفیظ نوفل اور اہم روسی شخصیات شامل ہیں۔
اعزازات اور کمیونٹی کا اعتراف
بیلاروس میں سابق پاکستانی سفیر سجاد حیدر خان نے 24 جنوری 2025 کو ان کی اعلیٰ صحافتی خدمات کے اعتراف میں انہیں تعریفی سرٹیفکیٹ دیا۔ اسی روز پاکستان ٹریڈ ہاؤس روس کے صدر ڈاکٹر زاہد علی خان نے بھی انہیں صحافتی خدمات کے اعتراف میں تعریفی سرٹیفکیٹ پیش کیا۔
پاکستان کمیونٹی روس کے صدر ملک شہباز، ممتاز بزنس مین ڈاکٹر طارق چوہدری اور ڈاکٹر بابر اسلام نے ہمیشہ ان کی صحافتی خدمات کو سراہا، جبکہ پاکستان کمیونٹی سینٹ پیٹرزبرگ کے ڈائریکٹر محمد آصف صدیقی نے بھی انہیں تعریفی شیلڈ دی۔ یہ اعترافات روس میں پاکستانی کمیونٹی اور سفارتی سطح پر ان کی صحافت کی اہمیت کو مزید اجاگر کرتے ہیں۔
کشمیر کاز اور وی لاگنگ
شاہد گھمن کشمیر الائنس فورم ماسکو کے زیراہتمام 9 آن لائن کشمیر کانفرنسز کی میزبانی بھی کر چکے ہیں، جن میں دنیا بھر کے کشمیری رہنما، سیاستدان، سفارتکار اور صحافی شریک ہوئے۔ اس کے ذریعے انہوں نے روس میں مسئلہ کشمیر کو اجاگر کرنے میں نمایاں کردار ادا کیا۔
ڈیجیٹل میڈیا میں بھی وہ سرگرم ہیں۔ “ٹریول ود گھمن” کے نام سے ان کا وی لاگ روس کے کلچر، خوبصورتی اور عوامی زندگی کو اجاگر کرتا ہے اور روسی امیگریشن قوانین و دیگر اہم موضوعات پر آگاہی فراہم کرتا ہے۔
کالم نگاری
بطور کالم نگار بھی شاہد گھمن کی تحریریں پاکستان کے معتبر اخبارات اور آن لائن پلیٹ فارمز پر شائع ہوتی ہیں۔ ان کے کالمز میں عالمی سیاست، پاک روس تعلقات، مسئلہ کشمیر اور فلسطین جیسے حساس مسائل پر گہری بصیرت ملتی ہے۔
شاہد گھمن کی خدمات کا تسلسل یہ ثابت کرتا ہے کہ وہ صرف روس میں مقیم صحافی نہیں بلکہ پاکستان کے مؤقف، عوامی مسائل اور قومی تشخص کو عالمی سطح پر اجاگر کرنے والے ایک مؤثر نمائندہ ہیں۔ ان کے اعزازات نہ صرف ان کی ذاتی کامیابی ہیں بلکہ روس میں پاکستانی صحافت کے لیے ایک سنگ میل کی حیثیت رکھتے ہیں۔
