کریملن میں امریکی نمائندوں اسٹیو وٹکوف اور جیرڈ کشنر سے ملاقات، یوکرین میں مستقل امن، علاقائی تنازعات اور انسانی ہمدردی کے اقدامات پر تبادلہ خیال
ماسکو (وائس آف رشیا): روس کے صدر ولادیمیر پوتن نے خبردار کیا ہے کہ یوکرین میں یورپی یا دیگر غیر ملکی فوجیوں کی تعیناتی روس کی قومی سلامتی کے لیے خطرہ ہوگی اور ایسی صورت میں جنگ دوبارہ شروع ہو سکتی ہے۔ انہوں نے واضح کیا کہ یوکرین میں تعینات ہونے والے غیر ملکی فوجی روسی مسلح افواج کے لیے جائز فوجی اہداف تصور کیے جائیں گے۔
صدر پوتن نے یہ بات کریملن میں امریکی صدر کے خصوصی نمائندے اسٹیو وٹکوف اور جیرڈ کشنر سے ملاقات کے دوران کہی۔ یہ ملاقات متحدہ عرب امارات کے دارالحکومت ابوظہبی میں روس، امریکہ اور یوکرین کے درمیان سہ فریقی مذاکرات کے تازہ دور کے اختتام کے اگلے روز ہوئی۔
ملاقات میں روسی صدر کے معاونین یوری اوشاکوف اور ولادیمیر میدنسکی کے علاوہ غیر ملکی ممالک کے ساتھ سرمایہ کاری اور اقتصادی تعاون کے لیے صدر کے خصوصی نمائندے کیریل دمترییف بھی شریک ہوئے۔
امریکی نمائندے ابوظہبی میں دو روزہ سہ فریقی مذاکرات میں شرکت کے بعد ماسکو پہنچے، جہاں ونوکووو ہوائی اڈے پر کیریل دمترییف نے ان کا استقبال کیا۔ یوری اوشاکوف کے مطابق انہوں نے امریکی نمائندوں کے ساتھ ابتدائی مشاورت بھی کی۔
صدر پوتن نے کہا کہ روس یوکرین میں عارضی جنگ بندی کے بجائے دیرپا اور مستقل امن چاہتا ہے۔ انہوں نے امریکی نمائندوں سے ابوظہبی مذاکرات کے نتائج اور یوکرین تنازع کے حل کے امکانات کے بارے میں ان کے جائزے سے آگاہ کرنے کی درخواست کی۔
روسی صدر نے کہا کہ یوکرین میں غیر ملکی فوج کی موجودگی روس کے لیے ابتدا ہی سے ناقابل قبول رہی ہے کیونکہ اس سے روس کی قومی سلامتی کو براہ راست خطرات لاحق ہوتے ہیں۔
صدر پوتن نے کہا کہ روس نے یورپی ممالک کے ساتھ مذاکرات کے دروازے کبھی بند نہیں کیے بلکہ یورپی ممالک نے خود روس کے ساتھ رابطے منقطع کیے۔ انہوں نے خواہش ظاہر کی کہ امریکہ یورپی ممالک کے ساتھ بات چیت کرے تاکہ یہ واضح ہو سکے کہ یورپ حقیقت میں امن چاہتا ہے یا جنگ۔
روسی صدر نے امریکی نمائندوں سے یورپی یونین کے نمائندوں کے ساتھ ہونے والی ان کی بات چیت کی روشنی میں یوکرین تنازع کے حل کے بارے میں یورپی مؤقف جاننے کی خواہش بھی ظاہر کی۔
صدر پوتن نے کہا کہ یوکرین کے ساتھ علاقائی معاملات سمیت مختلف متنازع امور پر بات چیت ضروری ہے۔ ان کے مطابق علاقائی مسئلہ شدید اختلافات کا باعث ہے، تاہم روس کے لیے سب سے اہم وہاں رہنے والے لوگوں کے حقوق اور اپنی روایات کے مطابق زندگی گزارنے کی آزادی ہے۔
انہوں نے کہا کہ یوکرین کی جانب سے بعض علاقوں کو غیر واضح کنٹرول والے خطے قرار دینے کا معاملہ بھی اٹھایا گیا ہے، لیکن روس کے نزدیک یوکرین کے ساتھ حد بندی کی صرف ایک لکیر ہے اور وہ ریاستی سرحد ہے۔
کونسٹنٹینووکا میں انسانی ہمدردی کے مشن کی تجویز
ملاقات کے دوران صدر پوتن نے کونسٹنٹینووکا میں انسانی ہمدردی کی بنیاد پر خصوصی مشن منظم کرنے کی تجویز بھی پیش کی۔
انہوں نے کہا کہ یہ مشن خیرسون کے علاقے الیوشکی میں کیے گئے انسانی ہمدردی کے اقدام کی طرز پر ترتیب دیا جا سکتا ہے اور اس کی ذمہ داری روس اور یوکرین کے انسانی حقوق کے محتسبوں کو سونپی جا سکتی ہے۔
صدر پوتن کے مطابق کونسٹنٹینووکا روس کے کنٹرول میں ہے اور روس وہاں انسانی مشن کی سلامتی یقینی بنا سکتا ہے۔ انہوں نے کہا کہ علاقے کے اطراف بارودی سرنگیں صاف کرنے کے لیے روس کو تقریباً پانچ دن درکار ہوں گے۔
روسی صدر نے مزید کہا کہ اگر کیف سمجھتا ہے کہ شہر اس کے کنٹرول میں ہے تو اسے اپنی جانب سے انسانی مشن کی سلامتی یقینی بنانی چاہیے۔
صدر پوتن کے مطابق کونسٹنٹینووکا میں اب بھی تقریباً 400 سے 500 عام شہری موجود ہیں۔ انہوں نے تجویز دی کہ انسانی ہمدردی کے اس مشن کی کوریج کے لیے امریکہ سمیت دیگر ممالک کے صحافیوں کو بھی مدعو کیا جائے۔
روسی صدر نے کہا کہ یوکرین کے ساتھ انسانی ہمدردی کے معاملات میں پیش رفت ہوئی ہے اور الیوشکی میں تعاون ایک مثبت تجربہ ثابت ہوا۔
انہوں نے امریکی نمائندوں سے کہا کہ وہ صدر ڈونلڈ ٹرمپ کو روس اور یوکرین کے درمیان رابطوں میں سہولت فراہم کرنے پر ان کا شکریہ پہنچائیں۔ صدر پوتن نے الیوشکی کے انسانی بحران کے حل میں کردار ادا کرنے پر امریکی خاتون اول میلانیا ٹرمپ کا بھی شکریہ ادا کیا۔
ابوظہبی مذاکرات مثبت رہے، اسٹیو وٹکوف
امریکی نمائندے اسٹیو وٹکوف نے صدر پوتن کا ملاقات کے لیے شکریہ ادا کرتے ہوئے کہا کہ ابوظہبی میں ہونے والے سہ فریقی مذاکرات کا ماحول مثبت رہا۔
انہوں نے کہا کہ روس اور یوکرین کے درمیان قیدیوں کے آئندہ تبادلے کا امکان تنازع کے حل کی جانب پیش رفت کی علامت ہے۔
وٹکوف کے مطابق ابوظہبی مذاکرات میں روسی اور یوکرینی وفود نے مؤثر انداز میں کام کیا۔ انہوں نے روسی مذاکراتی وفد کے سربراہ ولادیمیر میدنسکی کی کوششوں کو بھی سراہا۔
امریکی نمائندے نے بتایا کہ اگرچہ یورپی ممالک کے نمائندے ابوظہبی مذاکرات کی میز پر موجود نہیں تھے، تاہم انہیں مذاکرات کے بارے میں آگاہ رکھا گیا۔
اسٹیو وٹکوف نے کہا کہ وہ صدر پوتن کے ساتھ ہونے والی ملاقات کے نتائج سے یوکرینی صدر ولادیمیر زیلنسکی کو بھی آگاہ کریں گے۔
یورپ بھی یوکرین تنازع کے خاتمے کے لیے مذاکرات میں شریک ہونا چاہتا ہے، جیرڈ کشنر
ملاقات میں امریکی نمائندے جیرڈ کشنر نے امید ظاہر کی کہ کریملن میں ہونے والی بات چیت یوکرین تنازع کے خاتمے اور اس مقصد کے حصول کے ممکنہ راستوں پر تبادلہ خیال کا موقع فراہم کرے گی۔
انہوں نے کہا کہ امریکہ کے نزدیک یورپی ممالک میں بھی یوکرین تنازع کے خاتمے اور مذاکرات میں شرکت کی مضبوط خواہش موجود ہے۔
جیرڈ کشنر کے مطابق امریکہ نے یورپی ممالک کے ساتھ براعظم یورپ کے مستقبل کے سکیورٹی نظام کے بارے میں بھی بات چیت شروع کر دی ہے۔
کریملن میں ہونے والی ملاقات میں یوکرین تنازع کے سیاسی و سفارتی حل، علاقائی اختلافات، یورپی سلامتی، قیدیوں کے تبادلے اور انسانی ہمدردی کے اقدامات سمیت مختلف امور زیر بحث آئے۔
