ماسکو:(وائس آف رشیا) روس کے پارلیمانی انتخابات میں 46 لاکھ سے زائد افراد نے مقررہ وقت سے پہلے اپنا حق رائے دہی استعمال کیا۔
روس کے مرکزی الیکشن کمیشن کی چیئرپرسن ایلا پامفیلووا نے پریس بریفنگ کے دوران بتایا کہ روسی فیڈریشن کے مختلف علاقوں میں مجموعی طور پر 46 لاکھ 63 ہزار 960 افراد نے قبل از وقت ووٹ ڈالے۔
ایلا پامفیلووا کے مطابق مارشل لا نافذ ہونے والے 12 روسی علاقوں میں 44 لاکھ سے زائد شہریوں نے قبل از وقت اپنا حق رائے دہی استعمال کیا۔
روس کی نویں ریاستی دوما کے ارکان کے انتخاب کے لیے تین روزہ پولنگ 18 سے 20 ستمبر تک جاری رہے گی۔
روس کے مطابق حال ہی میں روسی فیڈریشن میں شامل ہونے والی دونیتسک اور لوگانسک عوامی جمہوریاؤں کے علاوہ خیرسون اور زاپروژیا ریجنز کے رہائشی پہلی مرتبہ روسی پارلیمنٹ کے ایوان زیریں ریاستی دوما کے انتخابات میں حصہ لے رہے ہیں۔
ریاستی دوما کے انتخابات میں مجموعی طور پر 10 سیاسی جماعتیں حصہ لے رہی ہیں، جن میں یونائیٹڈ رشیا، کمیونسٹ پارٹی آف رشین فیڈریشن، لبرل ڈیموکریٹک پارٹی آف رشیا، نیو پیپل اور اے جسٹ رشیا فار ٹروتھ شامل ہیں۔
انتخابات میں پارٹی آف پنشنرز فار سوشل جسٹس، کمیونسٹس آف رشیا، رودینا، پارٹی آف ڈائریکٹ ڈیموکریسی اور گرینز ایکولوجیکل پارٹی بھی اپنے امیدوار میدان میں اتار رہی ہیں۔
روس کے 39 وفاقی علاقوں میں علاقائی قانون ساز اداروں کے انتخابات بھی منعقد کیے جا رہے ہیں، جبکہ متعدد علاقوں میں علاقائی سربراہان کا انتخاب بھی ہوگا۔
آٹھ روسی علاقوں میں علاقائی سربراہان کا براہ راست عوامی ووٹ کے ذریعے انتخاب کیا جائے گا، جبکہ تین علاقوں میں علاقائی پارلیمان اپنے سربراہان کا انتخاب کریں گی۔
روس بھر میں ہونے والے مختلف سطحوں کے انتخابات کے دوران مجموعی طور پر 23 ہزار نشستوں پر امیدواروں کا انتخاب کیا جائے گا۔
