ماسکو: (شاہد گھمن) ماسکو میں جاری تین روزہ رشین انرجی ویک فورم 2026 کے دوسرے روز عالمی توانائی کی سلامتی، تیل و گیس کی منڈی، نئی ٹیکنالوجی، متبادل توانائی اور مختلف ممالک کے درمیان تعاون کے امکانات پر اہم اجلاس منعقد ہوئے۔
فورم میں مختلف ممالک کے حکومتی نمائندے، توانائی کے ماہرین، سرمایہ کار اور روسی و غیر ملکی کمپنیوں کے عہدیدار شریک ہیں۔ کاروباری نشستوں میں توانائی کی محفوظ اور بلاتعطل فراہمی، عالمی منڈی میں قیمتوں کا استحکام، ڈیجیٹل ٹیکنالوجی اور توانائی کے شعبے میں سرمایہ کاری کے نئے امکانات پر تبادلہ خیال کیا گیا۔
فورم کے موقع پر روس کے نائب وزیراعظم الیگزینڈر نوواک نے کہا کہ روسی ڈیزل کی امریکا کو پہلی کھیپ بھیجنے میں کم از کم دو سے تین ہفتے لگ سکتے ہیں۔ ان کے مطابق فراہمی شروع کرنے کے لیے معاہدہ طے کرنے، ایندھن لوڈ کرنے، بحری جہاز کا انتظام کرنے اور اسے خریدار کی جانب روانہ کرنے کا عمل مکمل کرنا ہوگا۔
الیگزینڈر نوواک نے کہا کہ روس اکتوبر میں تین لاکھ ٹن، نومبر میں پانچ لاکھ ٹن اور دسمبر میں دس لاکھ ٹن ڈیزل فراہم کرنے کی صلاحیت رکھتا ہے۔ بعد میں ماہانہ برآمدات کا حجم 30 لاکھ ٹن تک بڑھایا جاسکتا ہے۔
روس اور امریکا کے صدور ولادیمیر پوتن اور ڈونلڈ ٹرمپ نے 9 اکتوبر کو ٹیلی فون پر گفتگو کے دوران پیٹرولیم مصنوعات کی فراہمی پر تبادلہ خیال کیا تھا۔ امریکی انتظامیہ نے روسی ڈیزل کی عالمی منڈی کو فراہمی کے لیے 7 اپریل 2027 تک عمومی لائسنس جاری کیا ہے۔
روسی نائب وزیراعظم نے توانائی تنصیبات کی سلامتی کا معاملہ بھی اٹھایا۔ انہوں نے بتایا کہ یوکرینی ڈرونز نے ساراتوف اور ریازان کے علاقوں میں دو روسی آئل ریفائنریز کو نشانہ بنایا ہے۔ ان کے مطابق ان حملوں سے ظاہر ہوتا ہے کہ یوکرینی فریق توانائی تنصیبات پر حملے روکنے کی جانب پیش رفت نہیں کر رہا۔
فورم کے دوران روسی اور غیر ملکی کمپنیوں کے درمیان ملاقاتوں کا سلسلہ بھی جاری رہا۔ ان ملاقاتوں میں تیل و گیس، بجلی، جوہری توانائی، قابل تجدید ذرائع اور توانائی کے شعبے میں جدید آلات و ٹیکنالوجی کے استعمال پر بات چیت کی گئی۔
صدر ولادیمیر پوتن نے فورم کے شرکا کے نام اپنے پیغام میں رشین انرجی ویک کو عالمی توانائی کے اہم مسائل پر بامقصد گفتگو اور باہمی تعاون کے فروغ کے لیے ایک معتبر پلیٹ فارم قرار دیا۔
رشین انرجی ویک فورم 14 اکتوبر کو شروع ہوا تھا اور 16 اکتوبر کو اختتام پذیر ہوگا۔ فورم روسی حکومت، وزارت توانائی اور ماسکو حکومت کے تعاون سے منعقد کیا جا رہا ہے جبکہ روس کانگریس فاؤنڈیشن اس کی منتظم ہے۔
