ماسکو (وائس آف رشیا): روس کے صدر ولادیمیر پوتن نے یروشلم کے آرتھوڈوکس چرچ کے سربراہ پیٹریارک تھیوفیلوس سوم اور ماسکو سمیت تمام روس کے آرتھوڈوکس چرچ کے سربراہ پیٹریارک کیریل سے ملاقات کی ہے۔
یروشلم کے پیٹریارک تھیوفیلوس سوم روسی آرتھوڈوکس چرچ کے سربراہ پیٹریارک کیریل کی دعوت پر ماسکو پہنچے ہیں۔
روسی آرتھوڈوکس چرچ کے ایک ذریعے کے مطابق پیٹریارک تھیوفیلوس سوم کا دورۂ ماسکو 6 نومبر تک جاری رہے گا۔
واضح رہے کہ گزشتہ سال کے اختتام پر روسی صدر ولادیمیر پوتن نے پیٹریارک تھیوفیلوس سوم کو روس کے ساتھ دوستی، تعاون اور روحانی تعلقات کو مضبوط بنانے میں نمایاں خدمات کے اعتراف میں آرڈر آف فرینڈشپ سے نوازا تھا۔
یروشلم اور ماسکو کے آرتھوڈوکس چرچ کے مذہبی سربراہان کی روسی صدر سے یہ ملاقات دونوں مذہبی مراکز کے درمیان روابط کے تناظر میں اہمیت رکھتی ہے۔ تاہم ملاقات میں زیر بحث آنے والے مخصوص امور کی تفصیلات جاری نہیں کی گئیں۔
