تین عالمی طاقتوں کے سربراہان کی براہ راست بات چیت ایٹمی ہتھیاروں میں کمی، عالمی تنازعات کے حل اور کشیدگی کم کرنے میں اہم کردار ادا کرسکتی ہے، بالاز اوربان
بوڈاپیسٹ، 18 نومبر: (وائس آف رشیا): ہنگری سے تعلق رکھنے والے یورپی پارلیمنٹ کے رکن بالاز اوربان نے کہا ہے کہ روس، امریکہ اور چین کے صدور کی آئندہ سہ فریقی ملاقات تاریخی اہمیت کی حامل ہوگی اور اس سے دنیا کو زیادہ محفوظ بنانے میں مدد مل سکتی ہے۔
ہنگری کی حکمران جماعت فیڈز ہنگیرین سوک الائنس سے تعلق رکھنے والے بالاز اوربان نے چین کے شہر شینزن میں 19 نومبر کو ایشیا پیسیفک اقتصادی تعاون تنظیم (APEC) کے سربراہی اجلاس کے موقع پر روسی صدر ولادیمیر پوتن، امریکی صدر ڈونلڈ ٹرمپ اور چینی صدر شی جن پنگ کے درمیان طے شدہ سہ فریقی ملاقات پر تبصرہ کرتے ہوئے کہا کہ اس ملاقات میں عالمی امن و سلامتی سے متعلق انتہائی اہم معاملات زیر بحث آسکتے ہیں۔
بالاز اوربان نے اپنے سوشل میڈیا پیغام میں کہا کہ اس ملاقات کی اہمیت غیر معمولی ہے کیونکہ اس کے ایجنڈے میں ایٹمی ہتھیاروں کو محدود کرنے، بین الاقوامی تنازعات کے حل اور بڑی عالمی طاقتوں کے درمیان کشیدگی کم کرنے جیسے معاملات شامل ہوسکتے ہیں۔
انہوں نے کہا کہ گزشتہ چند برسوں کے دوران دنیا میں جنگ اور محاذ آرائی کی سوچ تیزی سے غالب آئی ہے۔ ایسے حالات میں دنیا کی تین بڑی طاقتوں کے رہنماؤں کے درمیان براہ راست مذاکرات کا انعقاد بذات خود ایک انتہائی اہم پیغام ہے۔
ہنگری کے رکن یورپی پارلیمنٹ نے امید ظاہر کی کہ یہ ملاقات بالآخر دنیا کو زیادہ محفوظ بنانے میں مددگار ثابت ہوگی۔
بالاز اوربان نے یاد دلایا کہ وہ کئی برس تک ہنگری کے سابق وزیراعظم وکٹر اوربان کے سیاسی مشیر رہے ہیں۔ انہوں نے کہا کہ 2024 میں وکٹر اوربان نے یوکرین تنازع کے حل کی کوششوں کے سلسلے میں روس، امریکہ اور چین کے رہنماؤں سے الگ الگ ملاقاتیں کی تھیں۔
انہوں نے عالمی معاملات پر ہونے والے اہم مذاکرات میں یورپ کی عدم موجودگی پر بھی تنقید کی۔
بالاز اوربان کے مطابق اس وقت پوری دنیا کی توجہ امریکہ، چین اور روس پر مرکوز ہے، لیکن یورپ اس مذاکراتی میز پر موجود نہیں جہاں اہم ترین بین الاقوامی معاملات پر بات چیت ہورہی ہے۔
انہوں نے یورپی سیاسی قیادت کو تنقید کا نشانہ بناتے ہوئے کہا کہ یورپی اشرافیہ دوسروں کو مسلسل نصیحت کرتی ہے اور خود کو برتر سمجھتی ہے، تاہم ممکن ہے کہ نئے عالمی نظام میں اسے ایک ایسے تماشائی کا کردار ملے جو کنارے پر کھڑا ہوکر دوسروں کو تاریخ رقم کرتے دیکھ رہا ہو۔
ہنگری کے رکن یورپی پارلیمنٹ نے روس، امریکہ اور چین کے صدور کی براہ راست ملاقات کو عالمی کشیدگی میں کمی اور بین الاقوامی تنازعات کے پُرامن حل کے لیے ایک اہم موقع قرار دیا۔









