ایران کے 38 پل ایک گھنٹے میں تباہ کرسکتے ہیں، مشرقِ وسطیٰ میں تین امریکی طیارہ بردار بحری جہاز مکمل جنگی تیاری کے ساتھ موجود ہیں، تاہم ایرانی بنیادی ڈھانچے کو تباہ نہیں کرنا چاہتے، ٹرمپ
واشنگٹن (وائس آف رشیا): امریکی صدر ڈونلڈ ٹرمپ نے کہا ہے کہ امریکہ نے ایران کے خلاف ممکنہ طور پر دوبارہ فوجی کارروائیاں شروع ہونے کی صورت میں ایرانی سرزمین پر حملوں کے لیے اہداف کی نشاندہی کرلی ہے، تاہم واشنگٹن ان اہداف کو نشانہ نہیں بنانا چاہتا۔
امریکی نشریاتی ادارے سی این این کو دیے گئے انٹرویو میں صدر ڈونلڈ ٹرمپ نے کہا کہ امریکہ ایران کے خلاف دوبارہ حملے شروع کرنے کے لیے تیار ہے اور اس وقت مشرقِ وسطیٰ میں تین امریکی طیارہ بردار بحری جہاز موجود ہیں۔
امریکی صدر نے بتایا کہ ایک اور طیارہ بردار بحری جہاز حال ہی میں خطے میں پہنچا ہے، جس کے بعد وہاں موجود امریکی طیارہ بردار بحری جہازوں کی تعداد تین ہوگئی ہے۔ ان کے مطابق تینوں بحری جہاز مکمل طور پر مسلح اور فوجی کارروائی کے لیے تیار ہیں۔
صدر ٹرمپ نے کہا کہ ایران میں جن اہداف کی نشاندہی کی گئی ہے، ان میں 38 پل بھی شامل ہیں، جنہیں امریکی افواج صرف ایک گھنٹے کے اندر تباہ کرسکتی ہیں۔
انہوں نے کہا کہ اگر ان پلوں کو نشانہ بنانے کا فیصلہ کیا گیا تو تمام 38 پل تباہ ہوجائیں گے۔
تاہم امریکی صدر نے واضح کیا کہ وہ ایران کے بنیادی ڈھانچے کو تباہ کرنے کو ترجیح نہیں دیتے۔
ڈونلڈ ٹرمپ نے کہا کہ وہ ایسا نہیں کرنا چاہتے کیونکہ ان پلوں کو دوبارہ تعمیر کرنے میں تقریباً 10 سال لگ سکتے ہیں۔
امریکی صدر نے مزید کہا کہ انہیں پلوں کو تباہ کرنا پسند نہیں کیونکہ پلوں کی تعمیر انتہائی مشکل کام ہے اور اس میں کئی سال لگ جاتے ہیں۔
صدر ٹرمپ نے اپنی تعمیراتی مہارت کا حوالہ دیتے ہوئے کہا کہ وہ ایک اچھے تعمیر کار ہیں اور جانتے ہیں کہ پل بنانا کتنا مشکل کام ہے۔
امریکی صدر کے مطابق واشنگٹن نے ممکنہ فوجی کارروائی کے لیے اہداف پہلے ہی طے کرلیے ہیں اور امریکی افواج مکمل تیاری کی حالت میں ہیں، تاہم وہ ایرانی بنیادی ڈھانچے کو تباہ کرنے سے گریز کرنا چاہتے ہیں۔
