کازان میں عوامی سفارت کاری سے متعلق بین الاقوامی گول میز کانفرنس، سفیر پاکستان کا آئندہ ’’روس مشرق‘‘ فیسٹیول میں پاکستانی ثقافت اور فنون کی بھرپور نمائندگی کا اعلان
کازان (وائس آف رشیا): روس میں پاکستان کے سفیر فیصل نیاز ترمذی نے کہا ہے کہ پاکستان روس کے ساتھ ثقافت، تعلیم، نوجوانوں کے تبادلوں اور عجائب گھروں کے شعبوں میں تعاون کو مزید فروغ دینے کے لیے تیار ہے۔ انہوں نے اعلان کیا کہ آئندہ بین الاقوامی ثقافتی میلے ’’روس مشرق‘‘ میں پاکستانی سفارت خانہ پاکستان کی ثقافت، فنون اور قومی ورثے کی بھرپور نمائندگی یقینی بنائے گا۔
سفیر پاکستان نے یہ بات 10 نومبر کو روسی جمہوریہ تاتارستان کے دارالحکومت کازان میں ’’عوامی سفارت کاری کے نمونے کے طور پر مشرقی بازار‘‘ کے عنوان سے منعقدہ گول میز کانفرنس میں شرکت اور خطاب کے دوران کہی۔
کانفرنس میں ثقافتی اداروں، جامعات، تخلیقی صنعتوں اور بین الاقوامی تعاون کے شعبوں سے وابستہ اہم شخصیات اور ماہرین نے شرکت کی۔ اجلاس کا مقصد عوامی سفارت کاری کے فروغ، مختلف تہذیبوں کے درمیان روابط اور ثقافتی و تعلیمی تعاون کے امکانات پر تبادلہ خیال کرنا تھا۔
اپنے خطاب میں سفیر فیصل نیاز ترمذی نے کہا کہ بین الاقوامی ثقافتی میلہ ’’روس مشرق‘‘ اس بات کی نمایاں مثال ہے کہ کس طرح روایتی دستکاریاں، کھانے، موسیقی اور مشترکہ ثقافتی روایات مختلف ممالک اور قوموں کے عوام کو ایک دوسرے کے قریب لاسکتی ہیں۔
انہوں نے پاکستان اور روسی جمہوریہ تاتارستان کے درمیان ثقافتی اور تاریخی مماثلتوں کا ذکر کرتے ہوئے کہا کہ دونوں معاشروں میں مختلف مذاہب، زبانوں اور روایات کے حامل لوگ آباد ہیں، جبکہ دونوں ایک بھرپور اسلامی تہذیبی ورثے کے بھی امین ہیں۔
سفیر پاکستان کے مطابق پاکستان جنوبی، وسطی اور مغربی ایشیا کے سنگم پر واقع ہے، جبکہ تاتارستان یورپ اور ایشیا کے درمیان ایک اہم رابطے کی حیثیت رکھتا ہے۔ اس جغرافیائی اور ثقافتی خصوصیت نے دونوں خطوں کو مختلف تہذیبوں اور ثقافتوں کے درمیان رابطے کا ذریعہ بنایا ہے۔
انہوں نے کازان کی تاریخی اہمیت کا ذکر کرتے ہوئے کہا کہ کازان کریملن میں مسجد اور گرجا گھر کی ایک دوسرے کے قریب موجودگی مذہبی رواداری اور پُرامن بقائے باہمی کی خوبصورت مثال ہے۔ پاکستانی عوام بھی مختلف ثقافتوں اور مذاہب کے درمیان باہمی احترام اور ہم آہنگی کی انہی اقدار کو اہمیت دیتے ہیں۔
فیصل نیاز ترمذی نے کہا کہ ثقافتی سرگرمیوں، تعلیمی اداروں کے درمیان تعاون، نوجوانوں کے تبادلوں اور عجائب گھروں کے روابط کے ذریعے پاکستان اور روس کے عوام کے درمیان دوستی اور باہمی افہام و تفہیم کو مزید مضبوط بنایا جاسکتا ہے۔
انہوں نے اس موقع پر اعلان کیا کہ آئندہ ’’روس مشرق‘‘ بین الاقوامی فیسٹیول میں پاکستانی سفارت خانہ پاکستانی ثقافت اور فنون کی نمایاں اور بھرپور شرکت یقینی بنائے گا تاکہ روسی عوام اور دیگر ممالک کے شرکاء کو پاکستان کے ثقافتی ورثے، روایات اور فنون سے متعارف کرایا جاسکے۔
گول میز کانفرنس میں راشد واگاپوف تاتار ثقافتی فاؤنڈیشن کے ڈائریکٹر رفعت فتحوف، جمہوریہ تاتارستان کے تخلیقی صنعتوں کی ترقی کے مرکز کے ڈائریکٹر جنرل رانکو تیپاوچیوچ، اکیڈمی آف یوتھ ڈپلومیسی اینڈ کری ایٹو کمیونیکیشنز کی چیئرپرسن دلبر صادقووا اور ہائر اسکول آف اکنامکس یونیورسٹی کے لیونید عیسیٰیف نے بھی شرکت کی۔
دیگر شرکاء میں کازان کے بین الاقوامی مسلم فلم فیسٹیول ’’گولڈن منبر‘‘ کی ایگزیکٹو ڈائریکٹر ملیاؤشا آئتوگانووا، تاتارستان کے قومی عجائب گھر کے ڈائریکٹر جنرل ایرات فیض رحمانوف اور اسٹریٹجک ڈائیلاگ اینڈ پارٹنرشپ کے فروغ سے متعلق فاؤنڈیشن کی نائب ایگزیکٹو ڈائریکٹر المیرا صادقووا شامل تھیں۔
کانفرنس کے شرکاء نے اس بات پر اتفاق کیا کہ ثقافت، تعلیم، سنیما اور سائنسی و تحقیقی تبادلے روس اور اسلامی دنیا کے درمیان باہمی افہام و تفہیم بڑھانے کے مؤثر ذرائع ہیں۔
شرکاء نے عوامی سفارت کاری کے فروغ کے لیے ثقافتی اور تعلیمی اداروں کے درمیان روابط کو اہم قرار دیا اور اس بات پر زور دیا کہ مختلف ممالک کے عوام کے درمیان براہ راست رابطے، مشترکہ ثقافتی سرگرمیاں اور علمی تبادلے بین الاقوامی تعاون کو مضبوط بنانے میں اہم کردار ادا کرسکتے ہیں۔
واضح رہے کہ کازان میں بین الاقوامی ثقافتی میلے ’’روس مشرق‘‘ کی افتتاحی تقریب 9 نومبر کو منعقد ہوئی تھی، جس میں سفیر پاکستان فیصل نیاز ترمذی نے بطور مہمانِ اعزاز شرکت کی تھی۔ اس کے اگلے روز منعقدہ گول میز کانفرنس میں ثقافتی سفارت کاری اور روس و اسلامی دنیا کے درمیان عوامی روابط کو فروغ دینے کے امکانات پر تفصیلی تبادلہ خیال کیا گیا۔
