روس، چین اور امریکہ کے صدور کی ملاقات پوری انسانیت کے لیے اہم پیغام دے سکتی ہے، کریملن

عالمی مسائل کے حل کے لیے بات چیت اور مذاکرات ضروری ہیں، صدر پوتن، شی جن پنگ اور ڈونلڈ ٹرمپ کی آئندہ ملاقات ایک تاریخی اہمیت کا حامل واقعہ ہوسکتی ہے، دمتری پیسکوف

ماسکو (وائس آف رشیا): روس کے صدارتی دفتر کریملن نے کہا ہے کہ روس، چین اور امریکہ کے صدور کے درمیان ہونے والی آئندہ سہ فریقی ملاقات پوری انسانیت کے لیے ایک مضبوط پیغام دے سکتی ہے کہ موجودہ عالمی مسائل سے نکلنے کے راستے تلاش کرنے کے لیے بات چیت اور مذاکرات ضروری ہیں۔

کریملن کے ترجمان دمتری پیسکوف نے منگل کو روسی ٹیلی ویژن چینل ویستی سے گفتگو کرتے ہوئے کہا کہ روسی صدر ولادیمیر پوتن، چینی صدر شی جن پنگ اور امریکی صدر ڈونلڈ ٹرمپ کے درمیان چین کے شہر شینزن میں ہونے والی ملاقات عالمی سطح پر اہمیت کی حامل ہوگی۔

تینوں ممالک کے صدور کی ملاقات ایشیا پیسیفک اقتصادی تعاون تنظیم (APEC) کے سربراہی اجلاس کے موقع پر طے ہے۔

دمتری پیسکوف نے کہا کہ یہ ملاقات کسی نہ کسی انداز میں پوری انسانیت کو ایک مضبوط پیغام دے سکتی ہے کہ موجودہ مسائل سے نکلنے کے راستے تلاش کرنے کے لیے مذاکرات کی ضرورت ہے۔

کریملن کے ترجمان نے روس، چین اور امریکہ کے صدور کی آئندہ سہ فریقی ملاقات کو ایک سنگ میل کی حیثیت رکھنے والا اہم واقعہ قرار دیا۔

اس خبر پر اپنی رائے کا اظہار کریں

اپنا تبصرہ بھیجیں