میکسیکو سٹی:(وائس آف رشیا) میکسیکو کی سرکاری تیل و گیس کمپنی پیمیکس نے امریکی پابندیوں کے خطرے کے باعث رواں سال کی تیسری سہ ماہی کے دوران کیوبا کو ایندھن کی فراہمی مکمل طور پر روک دی۔
میکسیکو کے اخبار ال یونیورسل کے مطابق پیمیکس کی جانب سے امریکی سکیورٹیز اینڈ ایکسچینج کمیشن میں جمع کرائی گئی رپورٹ میں بتایا گیا ہے کہ کمپنی کے ذیلی ادارے ’’سرویسیوس لوجسٹیکوس وائی ریکورسوس ایسٹریٹیجیکوس‘‘ نے تیسری سہ ماہی کے دوران کیوبا کو ایندھن کی کوئی کھیپ نہیں بھیجی۔
رپورٹ کے مطابق کیوبا کو ایندھن کی فراہمی رواں سال کی پہلی ششماہی میں ہی نمایاں طور پر کم کردی گئی تھی۔ جنوری سے جون 2026 کے دوران میکسیکو سے کیوبا کو اوسطاً صرف 900 بیرل یومیہ ایندھن فراہم کیا گیا۔
یہ مقدار گزشتہ دو برس کے مقابلے میں انتہائی کم ہے۔ 2024 کی پہلی ششماہی میں کیوبا کو میکسیکو سے روزانہ اوسطاً 19 ہزار 200 بیرل ایندھن فراہم کیا گیا تھا، جبکہ 2025 کے اسی عرصے میں یہ مقدار 19 ہزار 600 بیرل یومیہ رہی۔
رواں سال کی پہلی ششماہی میں فراہمی کم ہوکر صرف 900 بیرل یومیہ رہ گئی اور تیسری سہ ماہی میں اسے مکمل طور پر روک دیا گیا۔
ال یونیورسل کے مطابق میکسیکو کی جانب سے ایندھن کی فراہمی میں کمی اور بعد ازاں مکمل بندش کا مقصد ان امریکی پابندیوں سے بچنا ہے جو کیوبا کو خام تیل فراہم کرنے والے ممالک اور کمپنیوں کو نشانہ بنا سکتی ہیں۔
