ماسکو(وائس آف رشیا): روسی وزیر خارجہ سرگئی لاوروف اور ایران کے وزیر خارجہ عباس عراقچی کے درمیان ایرانی پہل پر ٹیلیفونک رابطہ ہوا، جس میں ایرانی کارگو جہاز پر یوکرینی ڈرون حملے اور مشرق وسطیٰ کی صورتحال پر تبادلہ خیال کیا گیا۔
روسی وزارت خارجہ کے مطابق سرگئی لاوروف نے 25 جولائی کو ایرانی ملکیت کے مال بردار جہاز “آنا” پر یوکرینی ڈرون حملے کے نتیجے میں ایک ایرانی ملاح کی ہلاکت پر گہرے دکھ اور افسوس کا اظہار کیا۔ یہ جہاز روس کے شہر آستراخان سے شہری سامان لے کر روانہ ہوا تھا۔
روسی وزیر خارجہ نے جاں بحق ملاح کے اہل خانہ سے تعزیت کا اظہار کرتے ہوئے زخمیوں کی جلد صحت یابی کے لیے نیک خواہشات کا اظہار کیا اور کہا کہ ان کی ہمدردیاں متاثرہ خاندان کے ساتھ ہیں۔
ایرانی وزیر خارجہ عباس عراقچی نے حملے کے بعد جہاز کے عملے کو امداد فراہم کرنے پر آستراخان کی مقامی انتظامیہ کا شکریہ ادا کیا اور اس بات پر زور دیا کہ کیف حکومت کی ایسی کارروائیوں کو روکنا ضروری ہے۔
گفتگو کے دوران عباس عراقچی نے سرگئی لاوروف کو مشرق وسطیٰ میں کشیدگی کم کرنے کے لیے جاری سفارتی کوششوں سے بھی آگاہ کیا۔ ان کے مطابق یہ کشیدگی امریکہ کی جانب سے ایران پر حملے کے بعد پیدا ہوئی، جسے کم کرنے کے لیے سفارتی رابطے جاری ہیں۔
