ماسکو(وائس آف رشیا) روسی صدر ولادیمیر پوتن نے چین کے صوبے شانشی میں کوئلے کی کان میں پیش آنے والے المناک حادثے پر چینی صدر شی جن پنگ سے تعزیت کا اظہار کیا ہے۔
کریملن کے مطابق صدر پوتن نے اپنے تعزیتی پیغام میں چینی صدر کو مخاطب کرتے ہوئے کہا کہ وہ کان حادثے کے افسوسناک نتائج پر دلی تعزیت اور ہمدردی کا اظہار کرتے ہیں۔
روسی صدر نے حادثے میں جاں بحق ہونے والے کان کنوں کے اہل خانہ سے ہمدردی اور یکجہتی کا اظہار کرتے ہوئے زخمیوں کی جلد صحت یابی کی خواہش بھی ظاہر کی۔
صدر پوتن نے اپنے پیغام میں کہا کہ “براہِ کرم جاں بحق کان کنوں کے اہل خانہ تک میری ہمدردی اور حمایت کے جذبات پہنچائیں، جبکہ زخمیوں کے لیے جلد صحت یابی کی نیک تمنائیں بھی قبول کیجیے۔”
کریملن کے مطابق روسی صدر نے پیغام کے اختتام پر چینی صدر شی جن پنگ کو “محترم دوست” قرار دیتے ہوئے اپنے دستخط ثبت کیے۔
