تہران (وائس آف رشیا) ایران کے وزیر خارجہ عباس عراقچی نے کہا ہے کہ ایران اور روس کے درمیان مختلف علاقائی اور عالمی امور پر ہمیشہ قریبی مشاورت جاری رہی ہے۔
روس پہنچنے پر اپنے بیان میں عباس عراقچی نے کہا کہ دونوں ممالک کے درمیان نہ صرف مختلف معاملات پر مسلسل رابطہ ہے بلکہ دوطرفہ مذاکرات بھی باقاعدگی سے ہوتے رہے ہیں۔
انہوں نے مزید بتایا کہ پاکستان کے ساتھ حالیہ مذاکرات بھی مثبت اور کامیاب رہے، جہاں اہم امور پر تبادلہ خیال کیا گیا اور مستقبل کے مذاکرات کے لیے ممکنہ راستوں اور شرائط کا جائزہ لیا گیا۔
ایرانی وزیر خارجہ نے عمان کے دورے کا ذکر کرتے ہوئے کہا کہ عمان ایک قریبی اور دوست ملک ہے، جس نے موجودہ صورتحال میں متوازن مؤقف اختیار کیا ہے۔
ان کا کہنا تھا کہ آبنائے ہرمز کے حوالے سے ایران اور عمان کے درمیان قریبی تعاون ضروری ہے، کیونکہ اس اہم سمندری راستے سے عالمی تجارت اور جہاز رانی کا بڑا حصہ گزرتا ہے۔
عباس عراقچی کے مطابق دونوں ممالک کی ذمہ داری ہے کہ وہ اس راستے کی سلامتی اور اپنے باہمی مفادات کے تحفظ کے لیے مربوط اقدامات کریں۔
