تہران / ماسکو(وائس آف رشیا) ایران کے وزیر کھیل احمد دنیا مالی نے اعلان کیا ہے کہ ایرانی قومی فٹبال ٹیم موجودہ حالات کے باعث 2026 فیفا ورلڈ کپ میں شرکت نہیں کرے گی۔
ایک ٹی وی انٹرویو میں احمد دنیا مالی نے کہا کہ امریکہ کی جانب سے ایران کے سپریم لیڈر کے قتل کے بعد موجودہ حالات میں ایرانی ٹیم کے لیے اس عالمی ٹورنامنٹ میں شرکت ممکن نہیں۔
انہوں نے کہا کہ ایسے حالات میں امریکہ میں منعقد ہونے والی عالمی چیمپیئن شپ میں حصہ لینا مناسب نہیں سمجھا جا رہا۔
2026 فیفا ورلڈ کپ کی میزبانی مشترکہ طور پر امریکہ، کینیڈا اور میکسیکو کریں گے۔ یہ ٹورنامنٹ 11 جون سے 19 جولائی 2026 تک تینوں ممالک کے 16 شہروں میں کھیلا جائے گا۔ اس بار پہلی مرتبہ ورلڈ کپ میں 32 کی بجائے 48 ٹیمیں حصہ لیں گی۔
ایرانی ٹیم پہلے ہی ورلڈ کپ کے لیے کوالیفائی کر چکی تھی اور قرعہ اندازی کے بعد اسے گروپ جی میں بیلجیم، مصر اور نیوزی لینڈ کے ساتھ رکھا گیا تھا۔ شیڈول کے مطابق ایران کے تینوں گروپ میچز امریکہ میں ہونے تھے۔
دوسری جانب فیفا کے صدر جیانی انفانٹینو نے کہا تھا کہ انہوں نے امریکی صدر ڈونلڈ ٹرمپ سے ملاقات کی ہے جس میں امریکہ میں ہونے والے ورلڈ کپ کی تیاریوں پر بات چیت ہوئی۔
ان کے مطابق ڈونلڈ ٹرمپ نے کہا کہ ایرانی قومی ٹیم کو ورلڈ کپ میں شرکت کے لیے امریکہ میں خوش آمدید کہا جائے گا۔
واضح رہے کہ 28 فروری کو امریکہ اور اسرائیل نے ایران کے خلاف فوجی کارروائی شروع کی تھی جس میں تہران سمیت کئی بڑے شہروں کو نشانہ بنایا گیا۔ اس کے بعد خطے میں کشیدگی میں نمایاں اضافہ دیکھنے میں آیا۔
