ماسکو (وائس آف رشیا) روس نے اسپین کے ایک آئی ٹی ماہر اور تعلیمی شعبے سے وابستہ شہری اینریکے آریاس گِل کو سیاسی پناہ دے دی ہے، جن پر ہسپانوی حکام نے روس کے حق میں جاسوسی اور سائبر حملوں میں ملوث ہونے کے الزامات عائد کر رکھے تھے۔
اینریکے آریاس گِل نے روسی خبر رساں ادارے سے گفتگو کرتے ہوئے بتایا کہ انہوں نے فروری 2025 میں روسی فیڈریشن سے سیاسی پناہ کی درخواست دی تھی، جو منظور کر لی گئی ہے، اور اس وقت وہ روس میں بطور سیاسی پناہ گزین مقیم ہیں۔
یورپی میڈیا رپورٹس کے مطابق اسپین کی ایک عدالت نے اینریکے آریاس گِل کے خلاف بین الاقوامی وارنٹِ گرفتاری جاری کیا تھا، جبکہ یوروپول نے بھی انہیں مطلوب افراد کی فہرست میں شامل کر رکھا ہے۔
ان پر الزام ہے کہ وہ ایک ٹیلی گرام چینل چلاتے تھے جس کے ذریعے روس کے حق میں معلوماتی مہم چلائی جاتی تھی، جبکہ بعض رپورٹس میں انہیں ایک مبینہ ہیکر گروپ سے منسلک بھی قرار دیا گیا ہے۔
اینریکے آریاس گِل اگست 2024 میں روس پہنچے تھے، جہاں وہ ماسکو میں قائم روسی ثقافتی ادارے کی اسکالرشپ پر تعلیمی سرگرمیوں میں مصروف تھے۔ ان کا کہنا ہے کہ اسپین میں ان کے خلاف الزامات سیاسی نوعیت کے ہیں، جس کے باعث انہیں وطن چھوڑنے پر مجبور ہونا پڑا۔
روسی ذرائع کے مطابق اینریکے آریاس گِل اب روسی شہریت حاصل کرنے کے لیے درکار قانونی دستاویزات کی تیاری کر رہے ہیں۔
