ماسکو(وائس آف رشیا) روسی وزارتِ انصاف نے چار غیر ملکی اور بین الاقوامی اداروں کو ملک میں ناپسندیدہ تنظیموں کی فہرست میں شامل کر دیا ہے۔ وزارت کی جانب سے جاری کردہ معلومات کے مطابق یورپی کرپٹو کرنسی ایکسچینج وائٹ بِٹ (WhiteBit) اور امریکہ میں قائم انٹرنیشنل ویمنز میڈیا فاؤنڈیشن کو باضابطہ طور پر بلیک لسٹ کر دیا گیا ہے۔
فہرست میں شامل دیگر اداروں میں یوکرین کا ریجنل سینٹر فار ہیومن رائٹس اور ڈبلیو گروپ فن ٹیک ایکو سسٹم بھی شامل ہیں۔
حکام کے مطابق اس سے قبل روس کے پراسیکیوٹر جنرل آفس نے وائٹ بِٹ کرپٹو ایکسچینج کو یوکرین حکومت اور یوکرینی فوج کی مالی معاونت کے الزامات کے تحت ناپسندیدہ قرار دیا تھا۔
روسی حکام کا کہنا ہے کہ ایسے اداروں کی سرگرمیاں ملکی سلامتی اور قومی مفادات کے منافی سمجھی جاتی ہیں، اسی لیے ان کے خلاف قانونی اقدامات کیے جا رہے ہیں۔
