پاکستانی گریجویٹس کی تنظیم اور پاکستان کمیونٹی روس کے صدر ملک شہباز کی جانب سے مبارکباد، تعلیمی، ثقافتی اور دوطرفہ تعلقات کے فروغ کے لیے ڈاکٹر شاہد حسن کی خدمات کو خراجِ تحسین
ماسکو (شاہد گھمن سے): پاکستان اور روس کے درمیان تعلیمی، ثقافتی اور دوستانہ تعلقات کے فروغ کے لیے طویل عرصے سے خدمات انجام دینے والے ڈاکٹر شاہد حسن کو روسی فیڈریشن کے ممتاز سرکاری اعزاز پشکن میڈل (Pushkin Medal) کے لیے نامزد کیے جانے پر پاکستانی گریجویٹس کی تنظیم اور پاکستان کمیونٹی روس کے صدر ملک شہباز نے دلی مبارکباد پیش کی ہے۔
ڈاکٹر شاہد حسن ایسوسی ایشن آف پاکستانی گریجویٹس فرام رشیا اینڈ سی آئی ایس کنٹریز (APGR & CIS) کے چیئرمین اور پاکستان میں روسی تعلیم و سائنس کے سفیر کی حیثیت سے خدمات انجام دے رہے ہیں۔ ان کی نامزدگی کو پاکستان اور روس کے درمیان تعلیمی، سائنسی اور ثقافتی تعاون کے فروغ کے لیے کئی دہائیوں پر محیط کوششوں کا اعتراف قرار دیا جارہا ہے۔
اس موقع پر ایسوسی ایشن آف پاکستانی گریجویٹس فرام رشیا اینڈ سی آئی ایس کے جنرل سیکرٹری انجینئر افتخار علی نے تنظیم اور اپنی جانب سے ڈاکٹر شاہد حسن کو خصوصی مبارکباد پیش کرتے ہوئے ان کی خدمات کو بھرپور انداز میں سراہا۔
اپنے تہنیتی پیغام میں انجینئر افتخار علی نے کہا کہ ڈاکٹر شاہد حسن کی پشکن میڈل کے لیے نامزدگی ان کی کئی دہائیوں پر محیط انتھک محنت، غیر معمولی قیادت اور پاکستان و روس کے درمیان سفارتی، ثقافتی اور تعلیمی روابط کو مضبوط بنانے کے لیے قابلِ قدر خدمات کا اعتراف ہے۔
انہوں نے کہا کہ ڈاکٹر شاہد حسن کی بصیرت اور قیادت پاکستانی گریجویٹس کی پوری برادری کے لیے مشعلِ راہ ہے۔ یہ نامزدگی نہ صرف ڈاکٹر شاہد حسن بلکہ پاکستان اور روس سمیت دولتِ مشترکہ کے ممالک سے تعلیم حاصل کرنے والے پاکستانی گریجویٹس کے لیے بھی باعثِ فخر ہے۔
دریں اثنا پاکستان کمیونٹی روس کے صدر ملک شہباز نے بھی ڈاکٹر شاہد حسن کو روسی فیڈریشن کے ممتاز سرکاری اعزاز پشکن میڈل کے لیے نامزد ہونے پر دلی مبارکباد پیش کی۔ انہوں نے ڈاکٹر شاہد حسن کی پاکستان اور روس کے درمیان تعلیمی، ثقافتی اور عوامی روابط کے فروغ کے لیے خدمات کو سراہتے ہوئے ان کے لیے نیک خواہشات کا اظہار کیا۔
ملک شہباز نے ڈاکٹر شاہد حسن کی نامزدگی کو روس میں مقیم پاکستانی برادری اور دونوں ممالک کے درمیان دوستانہ تعلقات کے فروغ کے لیے کام کرنے والی شخصیات کے لیے خوش آئند قرار دیا۔ انہوں نے امید ظاہر کی کہ پاکستان اور روس کے درمیان تعلیم، سائنس، ثقافت اور عوامی سطح پر تعاون کا سلسلہ مزید مضبوط ہوگا۔
انجینئر افتخار علی نے ڈاکٹر شاہد حسن کی صحت، کامیابی اور مستقبل میں مزید اعزازات کے لیے نیک تمناؤں کا اظہار کرتے ہوئے دعا کی کہ وہ بین الاقوامی تعاون، تعلیم اور دونوں ممالک کے درمیان دوستانہ تعلقات کے فروغ کے لیے اپنی خدمات جاری رکھیں۔
پشکن میڈل روسی فیڈریشن کا ایک سرکاری اعزاز ہے جو ثقافت، فنون، تعلیم اور بین الاقوامی ثقافتی روابط کے فروغ میں نمایاں خدمات کے اعتراف میں دیا جاتا ہے۔ اس اعزاز کا نام روس کے عظیم شاعر اور ادیب الیگزینڈر پشکن سے منسوب ہے۔
پاکستانی گریجویٹس کی تنظیم اور پاکستان کمیونٹی روس کی جانب سے ڈاکٹر شاہد حسن کے لیے تہنیتی پیغامات پاکستان اور روس کے درمیان علمی، ثقافتی اور دوستانہ تعلقات کے فروغ میں ان کی خدمات کی اہمیت کو اجاگر کرتے ہیں۔
